കോൺഗ്രസ് യോഗത്തിൽ തമ്മിൽത്തല്ല്

തദ്ദേശ തിരഞ്ഞെടുപ്പിന് ശേഷം കോൺഗ്രസിന്റെ മേൽത്തട്ടിൽ തുടങ്ങിയ അടി പ്രാദേശിക തലത്തിലേക്കും വ്യാപിക്കുന്നു. അടി മൂത്തപ്പോൾ കാൽ വഴുതിയത് കേരളത്തിലെ കോൺഗ്രസിന്റെ സമ്മുന്നത നേതാവിനും. കോൺഗ്രസ് തിരഞ്ഞെടുപ്പ് അവലോകന യോഗത്തിലെ കയ്യാങ്കളി പരിഹരിക്കാൻ ഇടപെടുന്നതിനിടെയാണ് മുൻ മുഖ്യമന്ത്രി ഉമ്മൻചാണ്ടിയുടെ കാൽ വഴുതിയത്.കോട്ടയം പൂവത്തിളപ്പിൽ അകലക്കുന്നം പഞ്ചായത്ത് തിരഞ്ഞെടുപ്പുമായ ബന്ധപ്പെട്ട കോൺഗ്രസ് മണ്ഡലം കമ്മിറ്റി അവലോകന യോഗത്തിലാണ് സംഭവം. കോൺഗ്രസ് മണ്ഡലം പ്രസിഡന്റിനെ സ്ഥാനത്ത് നിന്നും മാറ്റണം എന്ന് ആവശ്യപ്പെട്ട് ഒരു വിഭാഗം കോൺഗ്രസ് പ്രവർത്തകർ യോഗത്തിൽ ആവശ്യമുന്നയിച്ചു. എതിർ വിഭാഗം ഇത് എതിർത്തു. പിന്നാലെ പ്രശ്‌നം വാക്കേറ്റത്തിലേക്കും കയ്യാങ്കളിയിലേക്കും നീങ്ങി.ഇതോടെയാണ് യോഗത്തിൽ പങ്കെടുത്തിരുന്ന ഉമ്മൻചാണ്ടി പ്രവർത്തകരെ സമാധാനിപ്പിക്കാൻ വേദിയിൽ നിന്ന് തിടുക്കപ്പെട്ട് ഇറങ്ങിയത്. ഈ സമയത്ത് അദ്ദേഹം പടിയിൽ തട്ടി ഉമ്മൻചാണ്ടിയുടെ കാൽ വഴുതുകയായിരുന്നു. സുരക്ഷ ജീവനക്കാരും പ്രവർത്തകരും ഇടപെട്ടതുകൊണ്ട് വീഴ്‌ച ഒഴിവായി. ഉമ്മൻചാണ്ടിക്ക് പരിക്കുകൾ ഒന്നുമില്ലെന്നാണ് വിവരം. തദ്ദേശ തിരഞ്ഞെടുപ്പിന് ശേഷം സംഘടനതലത്തിലുളള അവലോകനത്തിനായി പുതുപ്പളളി മണ്ഡലത്തിൽ പര്യടനം നടത്തുകയാണ് ഉമ്മൻചാണ്ടി.