ദൃശ്യം 2 ആമസോൺ പ്രൈമിൽ തന്നെ; തീയേറ്ററുകളുമായി കരാറില്ലെന്ന് ആന്റണി പെരുമ്പാവൂർ

ദൃശ്യം 2 ആമസോൺ പ്രൈമിൽ തന്നെ റിലീസ് ചെയ്യുമെന്ന് ആവർത്തിച്ച് നിർമ്മാതാവ് ആന്റണി പെരുമ്പാവൂർ. റിലീസുമായി ബന്ധപ്പെട്ട് തിയേറ്ററുകളുമായി കരാറില്ല. കുഞ്ഞാലിമരയ്‌ക്കാർ തിയേറ്ററുകളിൽ തന്നെ റിലീസ് ചെയ്യുമെന്നും ആന്റണി പെരുമ്പാവൂർ അറിയിച്ചു.കുഞ്ഞാലിമരയ്‌ക്കാർ എന്ന സിനിമ നിർമ്മിക്കുന്നതിന്റെ ബുദ്ധിമുട്ടിനെക്കുറിച്ച് ആലോചിക്കാതെയാണ് ചില അംഗങ്ങൾ പ്രതികരിക്കുന്നത്. ദൃശ്യം 2 ഒടിടിക്ക് വേണ്ടി എടുത്ത സിനിമയല്ല. സാമ്പത്തിക ലാഭം ലക്ഷ്യമിട്ടായിരുന്നെങ്കിൽ മോഹൻലാലിനെ വച്ച് പത്ത് പടം നിർമ്മിക്കാമായിരുന്നുവെന്നും ആന്റണി പെരുമ്പാവൂർ പറഞ്ഞു.ദൃശ്യത്തിന്റെ റിലീസുമായി ബന്ധപ്പെട്ട് തിയേറ്ററുകളുമായി കരാറുണ്ടാക്കിയിട്ടില്ല. അതിനാൽ തിയേറ്റർ ഉടമകളുടെ യോഗത്തിൽ വിഷയം ചർച്ചയാകില്ലെന്നും ആന്റണി പെരുമ്പാവൂർ വ്യക്തമാക്കി.ദൃശ്യം 2ന്റെ ഒടിടി റിലീസിനെതിരെ ഫിലിം എക്‌സിബിറ്റേഴ്‌സ് അസോസിയേഷൻ നേരത്തെ രംഗത്തെത്തിയിരുന്നു. അമ്മയുടെ ഭാരവാഹിയായ മോഹൻലാൽ ഉൾപ്പെടുന്ന സിനിമ ഒടിടിയിൽ റിലീസ് ചെയ്യുന്നതിന് എതിരെയാണ് വിമർശനം.