സമ്മാനമായി കാമുകിയ്‌ക്ക് നൽകിയത് മോഷ്‌ടിച്ച ബൈക്ക്; കാമുകനും കൂട്ടുകാരനും പോലീസ് പിടിയിൽ

പ്രണയസമ്മാനമായി കാമുകി ചോദിച്ചത് ഒരു ബൈക്ക്. പ്രേമ പരവശനായ കാമുകൻ ചങ്ങാതിയെയും കൂട്ടിയിറങ്ങി നല്ലൊരു ബൈക്ക് മോഷ്‌ടിച്ച് കാമുകിയ്‌ക്ക് സമ്മാനിച്ചു. തുടർന്ന് പൊലീസ് നടത്തിയ അന്വേഷണത്തിൽ കാമുകൻ പിടിയിലായി. മുംബയ് നഗരത്തിലെ നലസോപ്പാറ വാസിയായ പ്രദീപ് ഉപാദ്ധ്യായയാണ് പൊലീസ് പിടിയിലായത്. ഒരു ഓൺലൈൻ ടാക്‌സി ഡ്രൈവറായ പ്രദീപ് സഹായിയെയും കൂട്ടി കാറിൽ പോയാണ് ബൈക്ക് മോഷ്‌ടിച്ചത്. ഇയാളുടെ സഞ്ചാരവഴി കണ്ടെത്താൻ പൊലീസിനെ ഓൺലൈൻ കമ്പനി സഹായിച്ചു.നഗരത്തിലെ കുരാർ പൊലീസ് സ്‌റ്റേഷൻ പരിധിയിലെത്തിയ പ്രദീപ് ബൈക്കുമായി കടന്നുകളഞ്ഞു. ശേഷം കുറച്ച് മാ‌റ്റങ്ങളൊക്കെ വരുത്തി ബൈക്കിൽ കാമുകിയുടെ പേരെല്ലാം സ്‌റ്റൈലായി എഴുതിച്ചേർത്താണ് ഇയാൾ ബൈക്ക് സമ്മാനിച്ചത്. പ്രായപൂർത്തിയാകാത്ത കുട്ടിയെ പീഡിപ്പിച്ച കേസിലും ഇയാൾ പ്രതിയാണെന്ന് പൊലീസ് അറിയിച്ചു. ഇയാൾ കാറുമായി സ്ഥലത്തെത്തിയതിന്റെ സിസിടിവി ദൃശ്യങ്ങൾ കണ്ട് പ്രതിയെ മനസ്സിലാക്കിയ പൊലീസ് പ്രദീപിനെയും മോഷണത്തിന് സഹായിച്ച സർവേശ് ഉപാദ്ധ്യായ(19) എന്നിവരെയും പിടികൂടുകയായിരുന്നു. മോഷണം പോയ ബൈക്ക് പ്രദീപിന്റെ കാമുകിയുടെ വീട്ടിൽ നിന്നും ഞായറാഴ്‌ച കണ്ടെത്തിയതായി പൊലീസ് അറിയിച്ചു.